GUARANI

Javy’áke San Juan árape. ¡San Juan dice que sí!

San Juan ára niko ha’e 24 jasypoteî, ha katu táva Paraguaikuéra rupi ko vy’aguasu oñepyrûma voi ára 23 javéramo.

Ko jerohory ojehe’a tupãreko ikarai’ÿva ndive. Umi español ou ñepyrûva’ekue ã tenda rupi, ohejava’ekue ñandéve ko vy’arã, ha katu paraguájova ñambohetave ko vy’arã ñamoirûgui chupe ñane mba’erekoite.

Pe 23 ka’aruetépe oiko tupãópe “víspera cantada” ha pe 24 jave katu oiko pe “misa concelebrada”; upéa rapykuéri oúma San Juan ñemboguata tupão jerére; opávo upéva ojegueraháma itupaõ’íme mbokavícho púpe..

Kuñataîva katu pe 23 guive oñepyrû ojapo opáichagua ñembosarairã oikuaa haguã:
– Omendátapa
– Mba’e taípepa oñepyrûta héra
– Ipirapire hetátapa
– Mboýpa imembýta ha mba’e…
Ha katu opavave ojatapy San Juan rérape ha upekuévo ojeguerohory kuarahy rata.

Jahechami umi ñembosarái ojejapóva San Juan ára guahêre.

Tatapÿi ári jehasa.

Opávo jepe’a rendy, opyta tatapўi pytã asy ha oñembosako’i ohasa haguã hi’ári pynandi mitãkuña térã mitãkaria’y. Ojeroviáva San Juan-re, ndokáiri araka’eve.

Pelota tata
Oñembosako’i peteî apu’avu ao pehenguégui ha oñemyakÿ brea ha kerosene-pe, oñemyendy hese tata ha oiko ñembosarái ko pelota tatáre mitã ha kakuaa apytépe.

Téra ñeporandu.

Pe 24 pyharevete osêva’erã kuñatãi hóga renondépe. Ohasávape oporanduva’erã hérare. Imenarã hérata upéicha avei.

Ryguasume ha avati ra’ÿi.

Peteî ryguasume (gallo) oñembotyva’erã tatakuápe pe 23 guive okaru’ÿre. Pe 24 oguãhêvo asajete jave kuñanguéra oñemongora ha henondépe omoîva’erã avati ra’ÿi aty’i. Oñeguenohê mymba tatakuágui ha ojepoi avati apytépe. Avati ho’úva pe kuñataî renondepegua, upéva omendáta oguahêvo peteî ary.

Tataindy ñeha’ã.

Oñembyatyva’erã mbohapy kuñataî ha oikytî peteî tataindy mbohapy hendápe. Omyendyva’erã hikuái pe 23 pyhare pytépe. Tataindy hendyparaêva jára omendaraêta.


Hetaite ñembosarairã San Juan ára rehegua oî!

Ko’ágã romohysýita umi oiko tapiáva avei: karréra pe, casamiento koygua, yvyra sÿi, kambuchi jejoka, karréra vosa, sortija ha mba’e.

Cháke! Oî avei “prevéra”. Ko kuñakarai he’íta ndéve hesakuápe remendátapa, nde po’átapa, nde pirapire hetátapa, nanga, reikuaaséva guive.

Terehasa porãite San Juan ára!

Click para agrandar