abc Google  
Marandú

Kolo’okuéra ojopyvaise Altamirano-pe

* Umi kolo’o Corte Suprema de Justicia-pegua osancionase ministro José Altamirano (Partido Patria Querida-ygua) ohenói haguére sociedad ha Iglesia-pe tomopu’ã iñe’ê pe resolución onohê va’ekue rehe ha omoneîva tendota Duarte Frutos rembipota. * He’i hikuái Altamirano rehe oviolaha aipo "decoro ha imagen judicial" rehegua.

Umi diputado ANR rehegua omoñepÿrûse huisio polítiko

Pe bancada kolo’o Cámara de Diputados rehegua katu omoñepÿrûse karai ministro-pe huisio polítiko "ohenói haguére umi organización social osê haguã guataháre ha topu’ã pe decisión judicial" rehe.

"Tavaygua nde’íriramo mba’eve, omoneî ojapóva umi huvicha"

Altamirano osê kuri okorói pe resolución omonéiva’ekue umi 5 miembro kolo’ova Corte Suprema-pegua. Umíva Raúl Torres Kirmser, Wildo Rienzi, Antonio Fretes, Víctor Núñez ha Alicia Pucheta. Ko’ãva he’i Tendota guasúpe ikatuha oasumi Junta de Gobierno ruvicha ramo, ha omomarã upekuévo he’íva Art. 237 ñane Constitución Nacional, peteínte va’erãha hembiapo Nicanor. "Tavaygua nde’íriramo mba’eve ko oukóvare, péva he’ise omoneîha ojapóva huvichakuéra", he’ikuri Altamirano.

Aravo araro’y rehegua oñepürû ko árape

Ko pyahareve guive oñepÿrû aravo araro’y rehegua. Péicha ko arateî voi oñembotapykueva’erã 1 aravo (60 aravo’i), ha upekuévo mayma tavaygua opytu’umivekuaa avei.

Hyakuã estafa pyahu ñane retãre Yacyretãme

Pe Entidad Binacional Yacyretá (EBY), opa haguã jeguerovua’ÿ ou ha ohóva rupi he’iva oîha corrupción pe licitación central Aña Cua reheguápe, onohêva’erã ohechauka mayvávape umi kuatia hesegua. Ndohechaukáivo umi kuatia, EBY ruvichakuéra opÿrû Constitución Nacional rehe, ha upekuévo tavaygua ndohecháivo umi kuatia, tuichave ohóvo jerovia’ÿ ha he’íta heta ha tuichaha umi malversación ha estafa ñane retã rehe ojejapóva. Itaipú ha Yaciretã naiporãvéima omokañÿse tavayguágui ojapóva. Ko’ágã peve oporombotavyse he’ívo oîha aipo "fuero binacional", ojahéiva ñane Constitución rehe. Tekotevê ojehecha porã ko licitatación Aña Cua rehegua; pépe hyakuã oñembosako’iha estafa guasu, oje’utahaguã 120 millón dólar, ha péva tavayguáguinte ojepe’áta.

Nicanor ndaikatúi osaymbyhy ANR, he’i ministro

Tandota guasu Nicanor Duarte Frutos ovioláta ñane Constitución asaimbyhýramo Partido Colorado, he’i karai ministro José Altamirano. Ha katu ndaikatúivoi kuri oike interna partidáriape candidato ramo jepe, he’ive. Altamirano oñe’ê péicha omboguapymboyve héra ovotakuévo inconstitucionalidad ojeruréva aty omyakãva Osvaldo Domínguez Dibb rehe, pe fallo Justicia Electoral omoneîva Duarte Frutos candidatúra rehegua. “Oiko haguã hekopete ñane sistema, iporã tendota oñangareko hembiapo guasúre, ha toheja ambue tembiapo’irei", he’i avei.

Filizzola ojerure ani legisladorkuéra oboicotea Ejecutivo-pe

Táva Valparaiso, Chile-guive, senador Carlos Filizzola (Congreso Nacional omyakãva) ojerure mayma parlamentario oposición-yguápe anitei oimo’ã ñemboharái pe hembiapo, tuichamba’eha tetãrehe ñemba’apo, ha anitei ombokarugua tape ha ombyai tembiaporã Poder Ejecutivo-gui osêva. Péva ojerure pe Corte Suprema oheja rire Nicanor Duarte-pe tojupy ANR ruvicha ramo. Filizzola oho kuri Chile-pe Tendotándive ojupi haguã presidenta pyahu Michelle Bachelet.

Lula oipe’áta pa’ã omoîva’ekue Receita Federal

Tendota Luis Inacio Lula da Silva ohendu kuehe ojeruréva chupe tendota paraguái Nicanor Duarte Frutos, táva Valparaíso-pe oî aja. Lula he’i omyatyrõtaha pya’e umi pa’ã omoîva Aduana rapái ruvichakuéra pe Puente de la Amistad akãme. Lula oñe’êta pévarã Receita Federal rehegua kuérandíve, ha avei omombe’u noñembotymo’ãiha Banco do Brasil sucursal Ciudad del Este-pegua.

Familia presidencial ndoikemo’ãi Club Centenario-pe

Ña Gloria Penayo de Duarte Frutos, tendota guasu rembireko, omoguahê kuatiahai Club Centenario-pe ha péva rupive he’i oipotaha tojepe’ánte pe jerure ojapóva’ekue oike haguã tendota familia (solicitud de afiliación) ko entidad social-pe socio ramo. Péicha oiko oñehendu rire oî heta ndohechaporãiva oike tendota guasu. Oje’e Nicanor imandu’avai hague ko club rehe yma campaña electoral 2003-pe.

FNC oipota G. 200.000 por Ha. mandyju rehe

Ohasa rire jejopyvaui arahaku, seka ha moñai ombyai heta rehemandujuty, Federación Nacional Campesina (FNC) ojeruréta gobiérnope 200 mil guarani por hectárea mandyjy oñeñotÿva’ekue rehe. Péva compensación ramo umi perjuicio rehe. Pévare oñemongetase umi chokokue kuéera tapicha Ministerio de Agricultura y Ganadería (MAG)-guándive. Gobierno he’íma kuri péva ojejapotaha, ha katu ne’îtã guateri omomba’e mba’éichatapa péva oiko.

Choferkuéra oñepÿrûta huelga ko’êramo

Tapicha choferkuéra umi micro rehegua oñepÿrûta ko’êramo huelga mbohapy ára pukukue ohótava hese (araapy 15 peve). He’i hikuái ndokuémo’ãiha mba’evete peaja. Ko tembiapo rupive ojokose hikuái umi licitación omongu’éva Secretaría del Transporte Público del Area Metropolitana y Asunción (SETAMA). Chupekuéra guarã, péva rupi heta chofer (4.000 rupi) opytáta mba’apo’ÿre.

"Umi papelera omongy’andevoi pe y”, he’i Molinas

"Umi papelera omongy’andevoi pe y, ha oime ramo ndogueroviáiva toho toy’u pégui”, he’i kuehe Ing. Agr. Alfredo Molinas (kóva ministro del Ambiente) ojerurévo toñemongu’emi Argentina-pegua mburuvichakuéra ojejoko haguã umi fábrica omongy’a ysyry. “Ndaipóri jajereterei haguã ja’é haguã Argentina tojoko pe contaminación oikóva umi papelera rupive”, he’i.

Mandu’a porã cómico José Ka’i rehe

Hekove pukukue ko karai araka’éve oñemboheko’yva’ekue. Ha péichaite avei kuehe oñeñotÿ karai Teodosio Ayala, ojekuaavéva José Ka’i ramo, omoñepyrûva’ekue Teatro Popular Ymaguare. Oñe’êva guive hese imandu’a tuicha honestidad ha humildad ombojeguakáva’ekue hekove. "Vy’ay jave", "Cuando un amigo se va", "Mi oración azul" ha club Guaraní himno oñehendu.

Festival de Ybycuí oikóta 5ha jevy

Ko pyahareve guive oikóta oikóta 5ha jevy Festival de Ybycuí. Pévarã tuicha ñembosako’i ko aty guasurã, hérava "Musiqueada mangoguýpe". Ko Festival de Ybycuí ojejapóta yvotyty ha yvyraguýpe, tenda "El Mangal"-pe, barrio Santa Rosa, táva Ybycy’ípe. Pépe opurahéita Quemil Yambay ha Los Alfonsinos, Josecito Alvarenga ha Paraguay Musical, Pablo Barrios ha Johnny Walker ndíve, Cariñito ha Floripón, Lilian Romero ha heta ambue kuña ha kuimba’e katupyry.

ÑE’ÊNGA

Nde arriero ky’a, cocina horcón

  • + Del Día
  • + De La Semana
  • + Del Mes

 Artículos más leídos

INSTITUCIONAL