Domingo, 23 de Marzo de 2008

Efeméride 1949: Emilio Díaz de Vivar es designado director interino del Colegio Militar “Mariscal Francisco Solano López”.

+ Ver Más
Temperatura Actual:

(
N.
.

+ Más información

Yma 2005-pe, ñane Gobierno imandu'a kangymi ramo tekotevêha oñenegocia porãmive pe electricidad osêva Itaipú-gui ha ohóva Brasil-pe precio, pe ñande socio oikuave'ê upe “fondo social”, mburuvicha gusu kuéra (ápe ha Brasil-pe) oipurúva avave ikatu'ÿre he'i chupekuéra mba'epve. Duarte Frutos-pe oñeme'ê 60 millón de dólar, ha oñembyesarái paite hikuái jerure Itaipu rehegua.

Opavave toguerovia ikatuha ojetyvyro ha oñakãrapu'ã

Oguahêmbaitémavo oúvo pe jeporavo guasu ára, jahecháta hápe mba'épa ikatu oha'arõ ñane retã ko 5 ary oútavape, avave naimandu'ái oimépa raka'e jaguereko Gobierno térã institución estatal kuéra oikovai, otyryry ha ojegueroria'ivéva pe ko'agãguágui. Ko Domingo de Pascua, Resurrección rehegua, opa cristiano omombareteha optimismo ha iñeha'arõ, ha'ete ñaneretãme guarã sa'ivéva hesakã ha ipy'aguapy. Upévare tekotevête mayma tavaygua omombarete ijerovia, ikatuha ñande Paraguái ojetyvyro ha oñakãrapu'ã, heta ohasa asy rire umi tapicha taryrýi ndopoiséiva poder-gui rupi.

João Cabral ha'e prepotente ha colonialista, he'i

Sa'i ñahendu péicha oiko, ha katu pe osêva he'i periodista brasilero Guilhobel Aurélio Camargo, tenda www.gazetadenovo.com guive ñanembovy'a. Pe Viernes Santo ára imandu'a jevy umi mburuvicha brasilero ojapóva pe “sagrado territorio itaipuano”-pe (péicha he'i Camargo) ha omoirû ñane retã remiandu Itaipu rehegua. João Cabral (director jurídico Itaipú rehegua) rehe katu he'i “prepotente ha colonialista”. Brasil “deslealtad” rupi Paraguái ndíve, pe y Itaipú-pegua ituju, ohai avei, he'i haguã ha'ekuéra oguerekovaiha ñane retãme.

Toñeme'ê “pago justo” ñande electridicidad rehe, he'i Lugo

Fernando Lugo jepive imandu'a imandu'a pe Tratado de Itaipu myatyrõ rehe, ha katu ko'ágã he'i ndaha'éiha renegociación rupi añónte ikatu ñanderupytyve mba'eporã. “Ko'ápe pe ojejeruréva hína toñemboaje pe Acuerdo de Foz de Yguazú, oipotáva 'pago justo' ñande energía eléctrica rehe”, he'i Lugo.

Tavaygua oikuaa Patria Querida rembiapo”, he'i Carrizosa

“Patria Querida omba'apoporãiterei oúvo mokõivéva Cámara-pe. Mayma tavaygua péva oikuaa”, he'i kuehe senador Miguel Carrizosa, candidato jevyvavoi. Ko'ágã omombaretese umi pyme ha ohechase ojejapóva umi “gasto social” rehe.

Alianza ombosako'i “acuerdo parlamentario" 2008 guive

Umi partido ha movimiento político ijatýva Alianza Patriótica para el Cambio (APC) oñembosako'i oñemoî haguã ñe'êpeteîme ikatu haguã diputado ha senador APC rehegua omba'apo oñondivepa ko 2008 guive. Pe mba'e tekotevêvéva, chupe kuéra guarã, tojejapo reforma añete heta institución del Estado-pe.

“Ndojejuhumo'ãi Fernando Lugo oike hague secuestro-pe”

Umi ombohováiva chupe he'i hese “fanático izquierdista”, ohayhuha violencia ha oikehague secuestro-pe. Fernando Lugo -candidato Alianza Patriótica para el Cambio (APC) rehegua- omyesakã hetamba'e umi oje'éva hese. “Che ndaha'éi izquierdista, ha araka'eve ndojuhumo'ãi hikuái Fernando Lugo oike hague secuestro-pe”, he'i, Omombe'u noñe'îhague ha'e Borda, Mateo ha Soares ndíve aipo ministro-rã.

Santacruz iñe'êho ha he'i oimeha tenda mbohapyhápe

Carlos María Santacruz, kóva Blanca Ovelar irû, he'i kuehe oimeha hikuái tenda mbohapyhápe ko'ágã, ha katu he'i pe mba'e omoambuetaha hikuái pya'eterei. Oguata hápe Carapeguá ha Quiindy rupi, okopi Fernando Lugo ha Oviedo rehe. Lugo rehe he'i ojekyhyjepaha chugui, ha Lino katu, chupe guarã “peteî jagua’i extranjero”.

Péjapo che ha'éva, ani pe che ajapóva

Péva pe he'iva Rubén Penayo, Martín Vázquez ha Derlis Valdovinos, omba'apóva fiskal Lucio Aguilera ndíve. Chupekuéra ojehecha kuehe ho'u iróva táva Villa Florida-pe. Ko'ágã hína umi oñangarekóva ani haguã oiko upépe “exhibicionismo ha exceso de alcohol”, ha pe Juves Santo pyhare ombyepoti tapicha veraneante. Ange pyhare oiko jevýta kuri operativo pyahu, ha pévarã oñembosako'i mbarete hikuái ka'arukue, ojehecha haguéicha.

Petropar ndohupimo'ãi gueteri nafta ha gasoíl repy

Ojupi tuicha ramo jepe tetã ambuére umi mba'e petróleogui ojejapóva repy, Alejandro Takahasi, Petropar ruvicha, omombe'u ndopokomo'ãiha gueteri ha'ekuéra umi precio rehe jasypo (mayo) peve. Upépe ae Petropar ombohasáta Ministerio de Industria y Comercio (MIC)-pe mba'échapa oime umi precio.

Banco Central ojoguáta óro

Banco Central del Paraguay (BCP) ojoguáta ko semana guive óro, ani haguã ñande reserva internacional (oiméva dólar-pe) ndovalevéi este. Péicha, ojehecha pe óro repy oho araíre, ha oje'e iporãveha péva ojejogua.

Chipa ha pan ipukuvéva ojehecháta ko pyhareve

Peteî chipa ipukúva 30 metro ha peteî pan 20 metro oguerekótava ojapóta ko pyhareve chipería Ña Eustaquia ha ohechukáta opavavépe Ñu Guazú-pe, 9:30 aravo jave. Pirapire oñembyatýva ko tembiapo hérava “La chipa y el pan más largos del mundo” rupive ohópaitéta Asociación de Ayuda a Niños con Cáncer y Leucemia (Asoleu)-pe.

ÑE'ÊNGA

Sapy'areírõ guarã,he'i kavajúpe oñakãitýva'ekue.

+ Del Día
+ De La Semana
+ Del Mes

Artículos más leídos

INSTITUCIONAL

Estadísticas
	Visitas	Páginas
Hoy	78.428	1.259.113
Ayer	89.495	1.295.218
Ultima actualizacion:
23/03/2008 00:00:00

Domingo, 23 de Marzo de 2008

Artículos más leídos