abc Google  
Marandú

Lugo oipota oñemba'apo barrio ha sindicato háre

Mburuvicha guasu oñe'ê kuehe 5.000 mitãruru ha kuñataî, Central ha táva Paraguayguápe. Ojerure chupekuéa toike ha toñemongu'e hikuái barrio, sindicato térã organización social ha polítikapýpe. Heta umi mitã pyahu omonde remera he'íva “Lugo” ijatukupe rehe. Péva oiko Expo de Capacitación y Empleo-pe, omongu'éva Gobernación Central rehegua.

"Hi'ãite sa'ive tekotevê ha tuichave tekojoja"

“Ko gobierno omba'apóta penderehe peguereko haguã empleo. Peê pevy'a ha peikoporã va'erã. Roipota imbarete pe vy'apavê. Rombosako'i teko iporãva peême guarã”, he'i pa'ikue. Lugo omombe'u avei hi'ãitéha chupe sa'ive ohóvo umi oikotevêtéva ha tuichave tekojoja ñande apytépe. Karai gobernador Central rehegua, Carlos Amarilla, ojerure toñeñangareko inversión privada rehe, hetave haguã tembiaporã opavavépe guarã. Empresario Gustavo Volpe katu imandu'a tekotevêha oñembyesako'i mano de obra katupyry imbareteve haguã umi industria.

Coordinadora Agrícola ojapose “tractorazo”

Umi Coordinadora Agrícola del Paraguay (CAP) rehegua oñemoîma kuehe py'apeteîme: ojapóta hikuái peteî “tractorazo” opresiona haguã Fernado Lugo-pe jahecha ndojokóipa pe violencia tetãpýre oiméva. Heta hendápe oime umi chokokue he'i ojokótaha sóha ñeñotÿ ha ipohãno. CAP ojapose ko ñemongu'e jasypakõi (diciembre) oúvape. Péicha omombe'u táva Ka'aguasu guive
Ramona Marecos, redacción regional guive.

Emergencia mba'e hi'upy oñembyai posádape

Ruta Transchaco ári, Montelindo-pe, oime 100 familia rupi asentada oikotevêtéva Secretaría de Emergencia Nacional (SEN) ñepytyvõmi rehe, opyta rire ýpe hogamimi. Ha katu ko ente del Estado omyakãva Camilo Soares oguereko peteî carga tuicha vívere upe jerére, ha encargado kuéra nome'êséi umi tapichápe hi'upy.

ABC remiandu

Okaraygua yvy'ÿ térã réra'ÿ? Ñane Gobierno ombohape háicha pe apokytã tapicha okaraygua reko rehegua omo'aguî vaicha ñane retã kapuguasúgui, ha heii vaicha ndojuhuseihavoi añetégua solución. Péina ipyahuvéva ha'e pe aty pyahu hérava ko'ágã Coordinadora Ejecutiva para la Reforma Agraria (CEPRA), oúva ombojo'a ambue comisión ha mesa de trabajo kuéra oimémavavoi. Ha katu ko'ágã peve, ndojekuaái mba'érepa, avave gueteri noñepyrûi tembiapo añete tekotevêva ojera haguã upe apokytã gausu: tekotevê censo okaraygua yvy'ÿ rehegua ojekuaa porãta mbovýpa oî, mb'éichapa héra, mba'evalleguápa, ndoguerekóta yvy ambue hendápe, noñeme'êimapa chupe yvy tenonderã ha ovende jevy mb'ae ra'e. Ko'ã mba'e ojekuaa vove, tuicha ñañembojáta solución rehe opa haguã ñekarãi tetãpýre.

Omano lustrabota ojapívo chupe peteî oficial de Marina

Peteî lustrabota 11 arymíva omano ohóvo hese pistola-gui peteî tiro. Oje'e ohoreitehague hese pe mbokapu, osêva peteî suboficial de Marina pógui. Ko jejuka oiko kuehe asajeArmada korapýpe, táva guasu Asunción-pe.

Ojejuhu delito ambiental Chore-pe

Cruce Liberación-pe oguahê fiscal ambientalista ha penal, ha chupekuéra omoirû funcionario Secretaría del Ambiente, Instituto Forestal Nacional ha Secretaría Nacional Vegetal. Upépe oike hikuái tenda hérava “Campos Nuevos” ryepýpe, peteî empresa brasilera mba'éva, opytáva táva Choré ypýpe. Ojejuhu oñe oñemoperõ ramoite 500 hectárea ka'aguy kuatia'ÿre. Pe administrador ha peón kuéra oime opyta preso. Péicha omombe'u Choré guive Sergio Escobar Rober.

SEAM oipe'a licencia ojoko haguã ka'aguy jeity

Pe Secretaría del Ambiente (Seam) ombogue kuehe licencia ambiental pe empresa Yaguarete Porã SA oguereko va'ekue. Péva oiporu hína kuri oity haguã ka'aguy opytáva territorio umi indígena Totobiegosode he'iva imba'eha, Alto Chaco-pe. Ko'ã ñande ypykue oime ra'e osê ra'e oho upégui umi empresario omoperõ rire chuguikuéra hekoha. Péicha Seam ojepytaso oñangarekóvo umi silvícola yvy rehe.

Paraguaya omba'apo Obama rehe

Rosa Franco-Iorio, ha'éva bailarina, intérprete ha traductora,omba'apo ra'e Estados Unidos-pe jeporavo guasu oiko va'ekue akokuehe 4 de noviembre, osêramo ramo guare ipu'aka Barack Obama, oiko haguã chugui peteîha mburuvicha guasu ipirehûva Norteamérika-pe. Rosa hekovereñói raka'e táva Ybycuí-pe, ha ko'ágã oipytyvõ hapicha latinokuérape mombyry.

Peteîha Colegio Técnico Mbya Guarani oñepyrûma hembiapo

Omba'apo ñepyrûma peteîha Colegio Técnico Agropecuario oñemopu'ãva mbya guaraní kuérape guarã. Péva oime táva J. Eulogio Estigarribia, asentamiento indígena Che’iro Ara Poty-pe, opytáva Km. 225, Ruta VI (Gaspar Rodríguez de Francia) ári. Ko tembiapo oñemohu'ã jopói omoîva Confederación Sudamericana de Fútbol ruvicha, Nicolas Leoz, rupive ha oipytyvõta 5 comunida mbyápe.

Ko árape

Araipára hína, ho'ysãta pyhareve ha hakúta ka'aru. Yvytu oipejúta yvýgotyo guio. Chaco-pe, yvate gotyo, oñeha'arõ ama mimi. Ikaru ho'ysã 17 grado peve ha hatukue ikatu 27 grado peve.

Ñe'ênga

Kóva oî hatã, he'i oñepysangáva.

  • + Del Día
  • + De La Semana
  • + Del Mes

 Artículos más leídos

INSTITUCIONAL

Contactos: Emails | Teléfonos | Staff
Publicidad: Como Anunciar | Fúnebres |Clasificados
Institucional: Nuestra Historia | ABC y la Educación | Libertad de Prensa | Propiedad Intelectual
Otros Canales: ABC Blogs | ABC Ciudadano | ABC Wap | ABC RSS | Archivo | Fotonoticias | Efemérides | Noticias por E-mail

ABC DigitalYegros 745 esq. Herrera. Tel: 41-51-550/51 © Copyright 2008. Reservados todos los derechos.

Estadísticas
 

Visitas

Páginas
Hoy

69.772

918.327
Ayer

68.145

890.403
Ultima actualizacion:
16/11/2008 00:00:00